Kubanden Qırımğa berilgen energetik köpür şimdi yarımadanı tam derecede elektrik ile teminlemez. Köpürniñ tam çalışması eki yıldan soñ mümkün olur, dey Energetik strategiyalar institutınıñ eksperti Yuriy Korolçuk.
Bu aqta o dekabr 16 künü Qırım.Aqiqat Radiosınıñ saba efirinde bildirdi.
Ekspertniñ sözlerine köre, energetik köpürniñ ekinci yolağı ket-kete işlettirilecek, farqlı tertibatlarnıñ qoşuluv ketişatı adet üzre bir yıldan çoqqa süre.
«Daa eki yıl bu köpürniñ 800 MVt küçü ile çalışmaycağını aytmağa mümkün. Episi bir quveti azca olacaqtır, çünki energetik tertibatınıñ qoşuluvı boyunca işlerni alıp baracaqlar», – dey Krolçuk.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Dekabr 8 künü Ukraina energetik tertibatından Qırımğa bir elektrik yolağı boyunca elektrikniñ berilmesi ğayrıdan tiklendi. Amma Qırımda alâ daa ağ qazaları yüz bere.
