Aqmescitte Turetskaya soqağınıñ sakinleri şeer şurası deputatlarına soqaqnıñ serlevasını deñiştirmemek ricası ile muracaatta bulundı. Bu aqta deputat Stepan Kiskin bildire.
«Muracaatta vatandaşlar Turetskaya soqağınıñ serlevasını deñiştirmemege rica eteler. Çünki bundan olar içün maliyeviy masraflarnıñ ve milletlerara ayırımnıñ olması mümkün. Muracaat müellifleri yazğanı kibi, soqaq serlevasınıñ deñiştirmelsi ile bağlı öz fikrini Aqmescit şeer şurasınıñ sessiyasında bildirmege razıdırlar», – yazdı deputat Facebookta.
O, Turetskaya soqağı sakinleriniñ imzaları ile muracaatnı aşkâr etti.
Turetskaya soqağı Aqmescitniñ merkezinde, eski tarafında yerleşe.
Dekabr 10 künü Aqmescitniñ Rusiye memuriyetiniñ komissiyası Turetskaya soqağı serlevasınıñ uçucı Oleg Peşkovnıñ adına deñiştirilmesini uyğunlaştırdı. Bu uçucığa Rusiye Qaramanı unvanı berildi. Aqmescitniñ Rusiye memuriyetiniñ başı Gennadiy Baharev Turetskaya soqağınıñ serlevasını deñiştirmek kibi teklifke qol tuttı.
Aqmescitniñ Rusiye memuriyetiniñ mimarcılıq ve şeer qurucılığı idaresi reberiniñ muavini Natalya Aleksandrenko soqaqqa elâk olğan uçucınıñ adını tek onıñ tuvğanlarınıñ razılığı ile bermege mümkün olğanını qayd etti.
Qırımnıñ Rusiye başı Sergey Aksenov aytqanı kibi, Qırım şeerleri Türkiyede qardaş şeerleri ile munasebetlerini toqtata.
Moskva ve Ankara arasında munasebet noyabr 24 künü Türkiye arbiyleri Türkiye-Suriye sıñırı yanında Rusiye arbiy uçağını tüşürgeninden soñ bozuldı. O vaqıt uçaqnıñ komandanı Oleg Peşkov elâk oldı.
