Qırımtatar Milliy Meclisi reisiniñ birinci muavini Nariman Celâl Keriç regional meclisniñ reisine esaslanıp, dekabr 15 künü Keriçte eki insannıñ ğayıp oluvı aqqında bildire – Ruslan Ganiyev ve dostu Arlen.
«Ekisi de din kütket musulmandır. Ruslan apayına ana-babasını ziyaret etecegini aytıp, saba erte evinden çıqtı, bundan soñ ondan haber yoq edi. Dostları arasında qıdırsalar, tünevin Keriçte körüngen dostu Arlenniñ de ğayıp olğanını ögrendiler. Ruslannı ğayet alçaq göñülli ve tınç insan olaraq tasvir eteler», – yazdı Facebooktа dekabr 15 künü Celâl.
Onıñ malümatına köre, tuvğanları politsiyağa muracaat ettiler.
«Anda ğayıp olğanlar saat sekizge qadar peyda olmasa, protokol tizmege vade ettiler», – yazdı Celâl, ve bu vaqıtqace ne Ruslan, ne Arlen tapılmağanını qayd etti.
Qırımnıñ uquq qoruyıcı organlarından bu aqta resmiy beyanat yoq.
Qırımda insanlarnıñ ğayıp oluvı ile bağlı ilk vaqia degildir. 2014 senesinden, Rusiye Qırımnı işğal etkeninden soñ, yarımadada insanlar, şu cümleden qırımtatarlar ğayıp olmağa başladı. Bu aqta halqara uquq qoruyıcılar, Qırımtatar Milliy Meclisiniñ yolbaşçılığı bildire edi. Ukraina Milliy havfsızlıq ve mudafaa şurasından yarımadada 21 yaşında qırımtatarnıñ ğayıp oluvı aqqında bildirgen ediler. Qırımda işbu vaqialarnıñ taqiqatı neticesizdir.
Qırımda İnsan aqları boyunca Rusiye vekâletlisi Lüdmila Lubina qırımtatarlarnıñ ğayıp oluvı aqta malümatnı tenqit ete ve aqiqatqa uymağanını bildire edi.
