Qırım qamaçavı boyunca aktsiya idarecisi, Qırımtatarlanıñ Bütündünya Кongressiniñ prezident muavini Lenur İslâmov 2015 soñunda – 2016 senesi başında Qırım deñiz qamaçavınıñ başlanuvını tahmin ete. Bu aqta o Kiyevde dekabr 15 künü Qırımtatar Milliy Meclisi yetekçileriniñ diplomatik eyyetlerniñ temsilcileri ile körüşüvden soñ bildirdi.
«Tafsilâtlıca aytamam. Biz oña (qamaçavğa – QA) bütün küç ve elimizde olğan vastalarımıznen azırlanamız. Yaqın istiqbal – seneniñ soñu – kelecek yılnıñ başı, onıñ nasıl olacağını kösterir… Sizni mıtlaq haberdar etermiz, bu aqta eşitirsiñiz», – dedi o, haber ete Qırım.Aqiqat mühbiri.
İslâmov şunı da qayd etti ki, Meclis yetekçileriniñ işğal etilgen yarımadanıñ deñiz qamaçavına razılığı endi bar. Aytqanı kibi, qamaçav teşebbüsçileri yarımadada yaşayışnı «işğalciler içün oñaytsız» etmege tırışacaqlar.
«İşğalciniñ toprağımızda yaşayışı oña paalığa tüşmesini ve zor olmasını ister edik, bunen oğraşamız, mümkün olğanı kibi – andan işğalcilerni quvmaq kerek, çünki o bizim soqaqlarımız, bizim qabirlerimiz, tarihımız, olarnıñ anda işi yoq, andan yoq oluñız, bizim evimiz», – dedi İslâmov.
Qırımtatar Milliy Meclisiniñ reisi Refat Çubarov bildirgeni kibi, adliyeciler Qırım deñiz qamaçavınıñ uquqiy imkânını ögreneler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
