Refat Çubarov: şeref, mertlik ve qırılmağan irade adamı Ahtem Çiygoz 51 yaşında

Bütün qırımtatar halqı Ahtem Çiygoznen ğurur duya. Biñlernen semetdeşi ve diger milletlerden olğan insanlar onı dost sayalar.

Ahtem Çiygoz bütün dünyada şeref, mertlik ve qırılmağan irade adamı olaraq belli. Onıñ aqqında memleketlerniñ prezidentleri ayta, qırımtatar halqına yañı dert ve telükelerni ketirgen Rusiyeniñ Qırım işğali qonuşılğan halqara körüşüvlerde onıñ adı yanğıray.

Ahtem Çiygoz qırımtatar halqınıñ eñ qıyın avdet ve tuvğan toprağında yerleşüv yılları hızmet etkenlerden biridir.

Bugünde-bugün o, Qırım ve qırımtatar halqınıñ serbest ve lâyıq kelecegi içün küreşmekte.

Ahtemniñ doğğan kününde 1944 senesi mayıs 18-de sürgünlik körgen, eki qız ve eki oğlannı östürgen, gençlik çağında qırımtatar milliy areketine qoşulğan ana-babası – Zeytulla ağa ve Aliye ablağa minnetdarlıq bildiremiz.

Ahtem Çiygoznıñ ömür arqadaşı, balaları ve torunlarına qoltutamız.

Rusiye işğalcilerinen beraber Qırım toprağına kelgen yamanlıqnı yaqın vaqıtta yoq etecekmiz, qırımtatar halqı ise kene serbest olacaq.

Aman-aman bir yıldan berli Qırımda apishanede yatqan Qırımtatar Milliy Meclisi reisiniñ muavini Ahtem Çiygoz dekabr 14-te 51 yaşını toldura Rusiye taqiqatçıları Ahtem Çiygoznı 2014 senesi fevral 26-da Qırım parlamentiniñ yanında yüz bergen «kütleviy çatışmalarda» iştirak etkeninde qabaatlana

Sayğılı Ahtem qardaşım! Doğğan künüñ hayırlı olsun!

Allahtan Saña ve Seniñ yaqınlarına sağ-selâmetlik tileyim!

Eminim, yaqın zamanlarda epimiz serbest Qırımda beraberlikte olacaqmız! İnşallah!

Refat Çubarov, Qırımtatar Milliy Meclisiniñ reisi

«Bloglar» rubrikasında bildirilgen fikir-tüşünceler müelliflerniñ noqtaiy-nazarlarını aydınlatıp, muarririyetniñ baqışları ile aynı olmaması mümkün