Qırım uquq qoruyıcı gruppasınıñ malümatına köre, Qırım Rusiye ükümetiniñ Emek ve içtimaiy qoruv nazirligi Qırım akimiyetiniñ icraiy organlarından işçiler – Türkiye Cumhuriyeti vatandaşları aqqında malümatnı toplamağa talap etti.
Uquq qoruyıcılarnıñ malümatına köre, Qırım nazirligi Rusiye Emek nazirliginiñ mektübine esaslana, kоpyasını aşkâr ete.
«Türkiye vatandaşlarınıñ celp etilmesi boyunca telkiflerniñ berilmesi aqqında» mektübinde nazirlik Qırım icraiy komitetlerinden Türkiye vatandaşları çalışqan teşkilâtlardan sorav mektüplerini toplamağa talap ete.
«Toplanılğan malümat arasında: 2016 senesiту kerek olğan hadimlerniñ, şu cümleden Türkiye vatandaşlarınıñ ve işçilerniñ – Türkiye vatandaşlarınıñ miqdarı. Böyle malümatnı Rusiye prezidentiniñ 2015 senesi noyabr 28 kününden № 583 «Rusiye Federatsiyasınıñ milliy havfsızlığınıñ teminlevi boyunca tedbirler ve Rusiye Federatsiyası vatandaşlarınıñ cinaiy ve diger qanunsız areketlerinden qoruvı ve Türkiye Cumhuriyetine qarşı mahsus iqtisadiy qararlarnıñ alınması aqqında» qararına esaslanıp toplaylar», – denile beyanatta.
Qırım uquq qoruyıcı gruppasınıñ reberi Olga Skripnik aytqanı kibi, işbu emir Türkiye vatandaşlarını iş tapuvı ve «mirgatsion» vesiqalarnıñ elde etüvi ceetinden ayırım yapuvını nazarda tuta.
«Kelecek sene Türkiye vatandaşlarınıñ iş faaliyeti içün vesiqalarnıñ berilmesi bayağı sıñırlanacaq. Qırımda, iqtisadiy saadan ğayrı, Türkiye vatandaşları tasil, medeniyet ve din saasında çalışa edi, islâm cemiyetiniñ vekilleri içün emiyeti büyük edi» – dedi Skripnik.
Gruppanıñ idarecisi Vissarion Aseyev dey ki, Qırımda böyle qararlarnıñ kirsetilmesi qırımtatarlarnıñ aqlarını da boza.
«Qırımda yaşağan ve çalışqan Türkiye vatandaşlarınıñ çoqusı qırımtatarlarıdır, Rusiye akimiyetiniñ Qırımda Türkiye vatandaşlarına nisbeten areketi neticesinde, Türkiye vatandaşları olğan qırımtatarlar tamır halqı temsilcileri kibi qavmiy Vatanında bulunmağa imkânından marum qalır» – dey Aseyev.
Qırımnıñ Emek ve içtimaiy siyaseti nazirliginiñ ya da Qırımnıñ Rusiye ükümeti vekilleriniñ bu aqta resmiy izaatı yoq.
Rusiye prezidenti Vladimir Putin noyabr 28 künü Türkiye Cumhuriyetine qarşı sanktsiyalarnı kirsetecek fermannı imzaladı. Bunıñ ile yanvar 1-den Rusiye ve Türkiye arasında vizasız rejim lâğu etile, Rusiye Federatsiyası vatandaşlarına ise Türkiye Cumhuriyetiniñ ziyaretinden vazgeçmege tevsiye etilgen.
Moskva ve Ankara arasında munasebet Rusiyeniñ Suriye cenkine qarışmasından soñ bozulmağa başladı. Noyabr 24 künü Rusiye arbiy uçağı Türkiye ava boşluğına kirgeni vaqtında urıp tüşürilgeninden soñ işbu munasebetler daa da kergin oldı
Qırımnıñ rusiyeli başı Sergey Aksenov yarımada ükümeti tarafından Türkiyege qarşı kirsetilecek cezalar aqqında bildirdi.
