Qırımnıñ aman-aman bütün şirketleri dekabr 15-den işke başlamağa azır, dedi yarımadanıñ Rusiye başı Sergey Aksenov.
«Cumhuriyet rayonlarında aman-aman bütün sanaiy ve ticariy şirketler dekabr 15-den tam işke başlamağa azır… Amma ticariy şirketlerniñ iş vaqtı fevqulâde vaziyetniñ yoq etilmesi boyunca regional ştablarnıñ tarafından belgilene», – dedi o, haber ete yarımada Rusiye ükümetiniñ matbuat hızmeti.
«Fevqulâde vaziyetniñ yoq etilmesi boyunca ştab tarafından ticariy şirketlerniñ iş vaqtına sıñırlav kirsetilmedi. Belediyelerniñ er angisi özü bu ya da o şirketniñ iş vaqtını belgiley. Havfsızlıqnı politsiya teminley», – qayd etti Aksenov.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Dekabr 8 künü Ukraina energetik tertibatından Qırımğa bir elektrik yolağı boyunca elektrikniñ berilmesi ğayrıdan tiklendi. Amma Qırımda alâ daa ağ qazaları yüz bere.
