Link açıqlığı

Saatnıñ esas haberi

Cemilev: qırımtatar yetekçisiniñ apayı Qırımnı terk etse, fena işmar olacaq


Qırımtatarlarnıñ milliy lideri, Ukraina prezidentiniñ qırımtatar halqınıñ işlerinden vekâletlisi ve Yuqarı Rada deputatı Mustafa Cemilev ailesi ne içün Qırımda yaşağanını añlattı. Siyasetçiniñ aytqanını «Petro Poroşenko Bloku» parlament firqası aşkâr etti.

«Vatandaşlarımıznı Qırımnı terk etmemek çağıramız. Qırımtatar yetekçisiniñ apayı terk etse (yarımadanı – QR), pek fena işmar olacaq. Başqalarğa anda qalmağa azırlığını aşlağanımızda, özlerimiz ketemiz. Em de onıñ esli başlı anası, ev, mülk, tuvğanları anda. Ara-sıra oña telefon eteler (vatandaşlar – QA), kettimi-yoqmı teşkereler», – dey Cemilev.

O kene de qorantasından uzaq bir yerde yaşamağa mecbur olğanda, böyle zor vaqıtta oña ne daa da qıyın kele degen sualge, öz siyasiy faaliyeti devamında sıq sürette ailesinden uzaq ve «pek hoş olmağan yerlerde» bulunğanını hatırlattı. «Şunıñ içün maña bu vaziyetten büyük stress olmay», – qayd etti qırımtatarlarnıñ milliy lideri.

«Vatanıma qaytmaq içün o qadar yıl küreştim, şimdi kene…Amma ne eteceksiñ, yaşayış», – dedi Mustafa Cemilev, ve «ailesi endi alışqanını» qoştı.

Cemilev – sovet uquq qoruyıcısı ve dissident, ukrain siyasetçisi, qırımtatar milliy areketiniñ yetekçisi, 1991 – 2013 seneleri Qırımtatar Milliy Meclisiniñ reisi.

Öz siyasiy baqışları içün Cemilev aliy oquv yurtundan quvuldı ve yedi kere maküm etildi. Apiste 15 yıl yatıр çıqtı. Sovet apishanesinde 306 kün açlıq tuttı. SSCB İnsan aqlarınıñ qoruvı boyunca teşebbüs gruppasınıñ tesisçi ve azalarından biri.

Ukraina mustaqilliginiñ ilân etilüvinden soñ Cemilev siyasiy ayatnıñ faal erbabı oldı. 1998 senesinden – Ukraina halq deputatı. Nobel mukâfatına namzet kösterildi.

2014 senesi baar vaqialarından soñ Rusiye akimiyeti Mustafa Cemilege Rusiye Federatsiyası territoriyasına ve nezareti altında olğan Qırımğa kirişini yasaq etti.

XS
SM
MD
LG