Link açıqlığı

Smedlâyev: Meclis azaları Çiygoznıñ ana-babasında onıñ doğğan kününi mahsus hızmetlerniñ nezareti altında qayd ettiler


Meclis azaları, qırımtatar areketiniñ faalleri bazarertesi künü Bağçasarayğa Ahtem Çiygoznıñ ana-babasına kelip, oğlunıñ doğğan künü ile hayırladılar.

«Bugün Ahtem Çiygoznıñ doğğan künü ile ana-babasını hayırladıq! Evde bulunğamızda, azbarda politsiya ve mahsus hızmetlerniñ hadimleri tura edi. Oña diqqat öyle bir büyük ki, atta ana-babasından qorqalar!» – dep yazdı Facebookta Qırımtatar Milliy Qurultayınıñ Merkeziy saylav komissiyasınıñ reberi Zair Smedlâyev.

«Dost, tuvğanları ve yaqınları toplandı. Yaqalanğan qırımtatarlarnıñ ana-babaları da keldi. Adetiy duadan soñ qoqulı qave ve çay içip, sürgünlik yerlerinde yaşayış, halqımıznıñ Vatanı – Qırımğa avdeti oğrunda küreşi aqqında hatırlavlar ile paylaştıq», – dep haber ete Meclisniñ matbuat hızmeti.

Bildirilgeni kibi, evniñ çıqışında olarnı «sürpriz bekley edi: «içeride olğanı ile ve Ahtemniñ ana-babasına qol tutmağa kelgenler ile meraqlanğan politsiya ve mahsus hızmetlerniñ hadimleri».

Aman-aman bir yıl devamında Qırımda SİZOda bulunğan Qırımtatar Milliy Meclisi reisiniñ muavini Ahtem Çiygoz dekabr 14 künü 51 yaşını toldura.

Hayırlav sözlerinde Meclis yolbaşçılığı semetdeşine bu sınavlarğa dayanmaq içün sabır, küç, sağlıq ve azatlıqnı tiley.

Qırımtatar Milliy Meclisi reisiniñ muavini Ahtem Çiygoznı Qırım parlamenti yanında 2014 senesi fevral 26-da keçirilgen kütleviy tertipsizliklerni meydanğa ketirmesi boyunca qabaatlap, 2015 senesi yanvar 29-da yaqaladılar.

2015 senesi noyabr 30 künü Qırımnıñ Yuqarı mahkemesiniñ Çiygoznı 2016 senesi yanvar 29-na qadar apiste bulunması aqta qararını lâğu etmedi.

XS
SM
MD
LG