Qırımda elektrik ağlarında qazalarnı yoq etmege devam eteler, bundan sebep yarımada sakinlerini elektrik teminleviniñ söndürilmesi aqta tenbiyeleyler.
Şu cümleden, Qırım Rusiye ükümetiniñ saytında dekabr 14 künü bildirilgeni kibi, Kezlevde yerli vaqıtqa köre 12:00 – 16:00 saatleri arasında 110 kVt yolağında yuz bergen qaza sebebinden yarıq olmaycaq. Tamir işlerniñ keçirilmesi bir 3-4 saat devam etecek.
0,4 kVt yolağında tamir işlerniñ keçirilmesi ve tiremelerniñ tiklenmesi sebebinden Kefede Panova soqağında saat 10:00 – 17:00 arasında elektrik energiyası söndürilecek.
Seyitler rayonında işlerni Ali Keç (Ohotskoye) köyünde saat doquzdan aqşam saat dörtke qadar yapacaqlar.
Qırım Nazirler şurasınıñ matbuat hızmeti bildirgeni kibi, Keriçte elektrik yolağınıñ üç yerinde qaza yüz berdi, ışıqsız bir 80 abonent qaldı. «Tamir işleri keçirile, dekabr 14-niñ birinci yarısında soñuna yetmeli», – denile beyanatta.
İçki rayonında bazarertesi künü saat 16:00-ğace 430 qullanıcı ışıqsız qalacaq.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Yaqında Qırım qamaçavı ştabınıñ reberi Lenur İslâmov ştab «Ukrenergo»ğa «Kahovka-Titan» elektrik yolağını Qırımğa ceryannı bermek içün tamamınen azırlamağa ruhset bergenini bildirdi. Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarovnıñ sözlerine köre, faaller tamirlengen elektrik yolağını qullanmağa fırsat berirler. Dekabr 7 künü «Pravıy sektor» ve «Aydar» temsilcileri bunıñ ile razı olmağanlarını ve aktsiyada artıq iştirak etmeycegini bildirdiler.
