Link açıqlığı

Qırım prokuraturasından Qırımda ATR sabıq jurnalistiniñ evindeki tintüvlerni taqiq etmege talap eteler


Ukraina Haber siyaseti naziriniñ keñeşçisi Emine Ceppar Ukraina Baş prokuraturası yanındaki Qırım Muhtar Cumhuriyetine ATR qırımtatar telekanalınıñ sabıq jurnalisti, «QaraDeniz production» studiyasınıñ muarriri Roman Spiridonovnıñ evinde Qırım ve Aqyar boyunca Rusiye FSB İdaresiniñ ve Rusiye Taqiqat komitetiniñ hadimleri tarafından keçirilgen tintüv boyunca ariza yazğandır.

Bu aqta dekabr 14 künü bazaertesi Ukraina Haber siyaseti nazirliginiñ matbuat hızmeti bildire.

Ukrain naziriniñ keñeşçisi aytqanı kibi, yarımadada söz serbestligine basqı daimiy sürette yapılmaqta.

«Fevral 26» ve «mayıs 3» işlerinden ğayrı, Qırım işğalci akimiyetiniñ daa bir basqı aleti peyda oldı – ATR telekanalınıñ saibine qarşı «qamaçav işi». Bu sebepten kanalnıñ sabıq hadimleri evlerinde defalarca tintüv keçirildi, tehnika tutıp alındı. Bu areketlerniñ maqsadı – er kesni qorquzmaq ve sustırmaq», – qayd etti Ceppar.

Aytqanı kibi, Qırımda Rusiye uquq qoruyıcıları tarafından yapılğan areketler Ukraina Cinaiy kodeksiniñ 171-nci maddesi «Jurnalistniñ qanuniy professional areketine aselet keder etüv» ve Ukraina CK 162-nci maddesi «Mesken toqunmazlığınıñ bozuluvı», Ukraina CK «Abrav» 186-ncı maddesine uyğun kele.

Dekabr 10 künü Qırım jurnalisti Roman Spiridonovnıñ Aqmescitteki evinde ve ana babasınıñ evinde tintüvler Qırım vatandaşlıq qamaçavınıñ teşebbüsçisi, ATR telekanalınıñ saibi Lenur İslâmovnıñ cinaiy işi çerçivesinde keçirilgen, dep bildirgen edi Qırım advokatı Cemil Temişev. Spiridonovnı tintüvden soñ FSB sorğuğa çağırdı.

Qırım uquq qoruyıcı organları tintüvni izaatlamaylar.

Dekabr 9-da FSB hadimleri tarafından nevbetteki tintüv Elzara İslâmovanıñ evinde keçirildi. Qırım qamaçavı idarecisi, ATR telekanalınıñ saibi Lenur İslâmovğa nisbeten açılğan cinaiy işniñ çerçivesinde keçirilgen ekinci tintüvdir.

Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.

Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.

XS
SM
MD
LG