Qırım advokatı Cemil Temişev Qırımda FSB hadimleri ATR telekanalınıñ saibi, Qırım qamaçavınıñ idarecisi Lenur İslâmovğa bir vaqıtları bağlı olğan er kesni ziyaret ete bilecegini tüşüne.
Bu aqta avdokat Qırım.Aqiqat Radiosınıñ efirinde bildirdi.
Qayd etkeni kibi, şimdi Qırımda ATR telekanalınıñ sabıq hadimlerini tinteyler.
«Bir vaqıtları Lenur İslâmov ile birlikte çalışqan, umumiy işi olğan insanlar evlerine nezaketli, medeniy ve er şeynen meraqlanğan FSB insanlarını musafirlikke bekley bileler», – dey Temişev.
Dekabr 10 künü Qırım jurnalisti Roman Spiridonovnıñ Aqmescitteki evinde ve ana babasınıñ evinde tintüvler Qırım vatandaşlıq qamaçavınıñ teşebbüsçisi, ATR telekanalınıñ saibi Lenur İslâmovnıñ cinaiy işi çerçivesinde keçirilgen, dep bildirgen edi Qırım advokatı Cemil Temişev. Spiridonovnı tintüvden soñ FSB sorğuğa çağırdı.
Dekabr 9-da FSB hadimleri tarafından nevbetteki tintüv Elzara İslâmovanıñ evinde keçirildi. Qırım qamaçavı idarecisi, ATR telekanalınıñ saibi Lenur İslâmovğa nisbeten açılğan cinaiy işniñ çerçivesinde keçirilgen ekinci tintüvdir.
Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.
Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.
