Link açıqlığı

Qırım qamaçavı boyunса vatandaşlıq qamaçavınıñ idarecisi Lenur İslâmov Ukraina Yuqarı Radasınıñ deputatlarını Rusiye tarafından işğal etilgen Qırımnıñ tam qamaçavını nazarda tutqan qanun leyhasını qabul etmege çağıra.

Bu aqta Qırım qamaçavı aktsiyasınıñ ştabı bildire.

«Ukraina Yuqarı Radasınıñ deputatları dekabr 31-ne qadar devlet seviyesinde Qırım tam qamaçavı aqqında qanun leyhasını qabul etmese, bunı kene «gece qunduzları» eter. Ukraina parlamenti Qırımğa er angi teminni toqtatmaq kerek. İradeñizni kösterip olsañız, kösteriñ! Tek qamaçavdan 500 insan degil de, Yuqarı Rada deputatları yüzünde bütün Ukraina olsun!» – dep bildireler beyanatta İslâmovnıñ sözlerini.

Ukraina deputatlarınıñ bir qısmı prezident ve ükümet başına Qırım ile ticariy munasebetlerni yasaqlaycaq qanun leyhasını işlep çıqarmağa teklifinde buyurdılar. Bunı qırımtatarlarnıñ yetekçileri yarımada territoriyasına mal ketirgen maşinalarnıñ kirsetilmemesi boyunca devamlı aktsiyanı ilân etkeninden soñ yaptılar. Qamaçav iştirakçileri siyasiy mabüslerniñ azat etilmesini talap eteler.

Noyabr 22 künü Herson vilâyetinde elektrik yolaqlarınıñ tiremeleri patladı, bundan sebep Qırımğa elektrik energiyası berilmey qaldı. Aktsiya iştirakçileri energetik qamaçavını ilân ettiler. Dekabr 8 künü ise Qırımnıñ qıtaiy Ukraina tarafından elektrik teminlevi qısmen tiklendi.

Qırımtatar Milliy Meclisiniñ reisi Refat Çubarov Yuqarı Radanı işğal etilgen territoriyalarnıñ elektrik teminlevini yasaq etecek qanunnı qabul etmege çağırdı.

XS
SM
MD
LG