Link açıqlığı

Qırımtatar Milliy Meclisine Aqmescitte İnsan aqları Künü munasebeti ile aktsiyanı keçirmege izin bermediler


Qırımtatar Milliy Meclisi bildirgeni kibi, Aqmescit akimiyetinden dekabr 10 künü Halqara İnsan aqları kününe bağışlanğan aktsiyanı keçirmege kene izin alalmadı.

Bunı Meclisniñ matbuat hızmeti bildire.

Matbuat hızmetinde qayd etilgeni kibi, Meclis bu sene dekabr 10 künü, adet üzre, İnsan aqları Kününe mitingniñ keçirilmesini planlaştıra edi, amma energetik qamaçavından ilân etilgen Fevqulâde vaziyet sebebinden Aqmescit memuriyeti 2015 senesi noyabr 22-den kütleviy, medeniy-eglenceli ve diger tedbirlerniñ keçirilmesini vaqtınca toqtatmağa qarar aldı. Şunıñ içün mitingniñ keçirilmesinden vazgeçmege mecbur oldılar.

Amma, Mecliste qayd etilgeni kibi, noyabr 27-de Aqmescitniñ merkeziy meydanında akimiyet tarafdarları Türkiyege qarşı aktsiyanı keçirip, anda Türkiye prezidentiniñ qorquqlığını ateşke berdiler.

«İşbu şaraitlerde Qırımtatar Miilliy Meclisi dekabr 10 künü Aqmescitte Sevastopolskaya soqağında yereşken Qırım prokuraturası binası yanında mitingniñ keçirilmesine ariza yazıp, mında siyasiy mabüslerni azat etmege ve siyasiy taqiplerni toqtatmağa talap etecek oldı», – deyler Mecliste.

Amma yuqarıda qayd etilgen yasaqqa esaslanıp, mitingni keçirmege izin bermediler.

«İnsan aqları ceetinden bu kibi ekileme standartlar Qırımda ep yüz bere», – qayd ettiler Mecliste.

Kiyevde Rusiye Federatsiyasınıñ elçihanesi yanında dekabr 10 künü İnsan aqlarınıñ qoruvı Künü munasebeti ile miting keçti. Qırım.Aqiqat mühbiri bildirgeni kibi, tedbirde Qırımtatar Milliy Meclisiniñ temsilcileri, uquq qoruyıcılar, Qırım ve Donbasstan köçip kelgenler iştirak etti. Toplanğanlar ellerinde: «Qırımtatar genotsidine stop», «Ayırım, tintüv, tevqiflerge yoq», «Siyasiy mabüslerniñ olması – sovet keçmişine keri adım» kibi levhalarnı tuta edi. Aynı şu künü bu kibi aktsiyanı Turkiyede keçirdiler.​

XS
SM
MD
LG