Ermeni Bazar şeeriniñ mahkemesi «mayıs 3 künü» iştirakçisi Tair Smedlâyevni eki yıllıq şartlı apis cezasınа maküm etti. Bu aqta Qırım Rusiye prokuraturasına esaslanıp «Qırımda insan aqları» uquq qoruyıcı gruppası bildire.
«Ermeni Bazar şeer mahkemesi İslâm-Terek rayonınıñ 53 yaşında Tair Smedâlevge nisbeten üküm çıqardı. Prokuratura tarafından berilgen delillerge köre, Rusiye Cinaiy Kodeksiniñ 318 maddesi 1-nci qısmı boyunca cinayetniñ etilmesinde qabaatlana», – denile beyanatta.
Aynı şu iş boyunca dekabr 7 künü Ermeni Bazar mahkemesi bu işniñ diger iştirakçisi Edem Osmanovğa üküm çıqardı. Oña bir yıllıq şartlı apis cezasını belgilediler. Edem Osmanov qabaatını tanımadı.
Qırımtatar faali Tair Smedlâyev Rusiye uquq qoruyıcıları tarafından Eski Qırımda 2014 senesi oktâbr 22 künü yaqalandı. Bıltır dekabr ayında apis cezasını kefaletke deñiştirdiler.
Evel Qırımnıñ Rusiye prokuraturası bildirgeni kibi, Ermeni Bazar şeer mahkemesi Aqmescit rayonı 45 yaşında Edem Ebulisovnı «mayıs 6 işi» boyunca qabaatlı tanıdı, oña 40 biñ ruble miqdarında para cezası berildi.
