Kiyevde Rusiye Federatsiyasınıñ elçihanesi yanında dekabr 10 künü İnsan aqlarınıñ qoruvı Künü munasebeti ile miting keçe.
Qırım.Aqiqat mühbiri bildirgeni kibi, tedbirde Qırımtatar Milliy Meclisiniñ temsilcileri, uquq qoruyıcılar, Qırım ve Donbasstan köçip kelgenler iştirak ete. Çoqusı ellerinde ukrain ve qırımtatar bayraqlarını tuta.
Rusiye elçihanesiniñ isarı yanında Rusiye tarafından işğal etilgen Qırım apishanelerinde bulunğan ve ğayıp olğan qırımlılarnıñ süretleri asıla.
Toplanğanlar ellerinde: «Qırımtatar genotsidine stop», «Ayırım, tintüv, tevqiflerge yoq», «Siyasiy mabüslerniñ olması – sovet keçmişine keri adım» ve ilâhre.
Miting tınç sürette keçe, iştirakçiler ögünde Meclis ve «YevromaydanSOS» areketniñ temsilcileri çıqışta buluna.
Dekabr 10 künü BMT Baş assambleyası tarafından 65 yıl evelsi teşkil etilgen Halqara insan aqları kününi qayd eteler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
