Qırımda yüz bergen repressiyalar Meclis yetekçileriniñ Ukrainada diplomatik eyyetlerniñ yolbaşçıları ile dekabr 15 künü Kiyevde olacaq körüşüvde muzakere etilecek, dep bildire Meclisniñ matbuat hızmeti.
Körüşüv mevzusı – «Qırımnıñ Rusiye işğali şaraitlerinde qırımtatar halqı temsilcileriniñ taqibi ve insan aqlarınıñ bozuluvı: Ukraina ve halqara toplulıq tarafından qoruv imkâniyeti».
«Bugün qırımtatar halqı ögünde acele ve uyğunlaştırılğan areketlerni talap etken bir çoq mesele bar. Ukrain halqı, Ukraina ükümeti ve halqara toplulıqnıñ temsilcileri işğal etilgen Qırımda ve onıñ tışında bulunğan Ukraina vatandaşları aqlarınıñ qoruvı boyunca strategiyanı amelge keçirmege tırışamız», – denile muracatta.
Körüşüv soñunda teşkilâtçılarnıñ brifingi planlaştırıla.
Böyle körüşüvler qırımtatar milliy lideri Mustafa Cemilevniñ teşebbüsi ile 2011 senesinden keçirile.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
