Link açıqlığı

Qırım jurnalisti Lilâ Bucurova Qırımda dekabr 10 künü uquq qoruyıcılar tarafından QaraDeniz production studiyasınıñ muarriri Roman Spiridonovnıñ evinde keçirilgen nevbetteki tintüv aqqında bildire. Evel ATR telekanalında muarrir olaraq çalışa edi.

«Show devam ete. Bugün saba Roman Spiridonov – QaraDeniz production muarririne musafirler keldi. Silâsız. Özlerini tınç alıp baralar, atta balalarnı bala bağçasına yolladılar», – dep yaza Bucurova.

Spiridonovnıñ özü ve Qırım uquq qoruyıcı organları tintüvni izaatlamaylar.

Dekabr 9-da FSB hadimleri tarafından nevbetteki tintüv Elzara İslâmovanıñ evinde keçirildi. Qırım qamaçavı idarecisi, ATR telekanalınıñ saibi Lenur İslâmovğa nisbeten açılğan cinaiy işniñ çerçivesinde keçirilgen ekinci tintüvdir.

Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.

Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.

XS
SM
MD
LG