Ukraina Baş prokuraturası yanındaki QMC prokuraturası dekabr 9 künü FSB hadimleri tarafından ATR qırımtatar telekanalınıñ sabıq baş müdiri Elzara İslâmovanıñ evinde keçirilgen qanunsız tintüv boyunca mahkemeden evel taqiqatqa başladı. Bu aqta Qırım.Aqiqatqa prokuraturada bildirdiler.
Cinaiy iş aynı şu künü – tintüv aqqında haber peyda olğanda, açıldı.
«Qırım territoriyasında havfsızlıq organı – Rusiye Federatsiyasınıñ FSB bölüginiñ hadimleri tarafından Elzara İslâmovanıñ evinde keçirilgen tintüv boyunca cinaiy iş açıldı. Evel onıñ evinde noyabr ayında keçirilgen tintüv boyunca QMC prokuraturası Ukraina Cinaiy kodeksiniñ 162 maddesi 2-nci qısmına ve Ukraina CK 187 maddesi 3-nci qısmına köre qanun bozuluvı hususiyetleri boyunca mahkemeden evel taqiqatlarnıñ yekâne cedveline malümat kirsetilgen edi», – deyler prokuraturada.
İslâmovanıñ evinde nevbetteki tintüv FSB hadimleri tarafından dekabr 9-da keçirildi. Qırım qamaçavı idarecisi, ATR telekanalınıñ saibi Lenur İslâmovğa nisbeten açılğan cinaiy işniñ çerçivesinde keçirilgen ekinci tintüvdir.
Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.
Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.
