Qırımnıñ Rusiye prokurorı Natalya Poklonskaya yarımadağa qıtaiy Ukrainadan elektrikniñ berilmesi toqtatılğanından sebep peyda olğan çoq millionlı ziyan olğanı aqqında bildire.
«Millionlar, belki de, milliardlar, şimdi millionlar. Bu raqam er kün tüzetile. Biz ziyannı cumhuriyetniñ bütün müessiselerinden soraştıramız. Qırımda bundan evel yahşı çalışqan er şey toqtaldı», – dedi jurnalistlerge Poklonskaya.
Aytqanı kibi, ziyan tek raqamlarda baqılmay, bu vaziyet «qırımlılarnıñ yaşayışına telüke yarattı.
«Bir şeyni qaçırmamız ve unutmamız. Er şeyni ğayrıdan teşkerermiz ve sayarmız, esası, qabaatlı şahıslarnıñ bu ziyannı tazmin etmek içün mülkiyeti yetmeli», – dey Poklonskaya.
Yaqında Qırım qamaçavı ştabınıñ reberi Lenur İslâmov ştab «Ukrenergo»ğa «Kahovka-Titan» elektrik yolağını Qırımğa ceryannı bermek içün tamamınen azırlamağa ruhset bergenini bildirdi. Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarovnıñ sözlerine köre, faaller tamirlengen elektrik yolağını qullanmağa fırsat berirler. Dekabr 7 künü «Pravıy sektor» ve «Aydar» temsilcileri bunıñ ile razı olmağanlarını ve aktsiyada artıq iştirak etmeycegini bildirdiler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqlаdı.
