Qıtaiy Ukrainada başlanğan Qırım qamaçavı sebebinden insan aqları bozuldı, denile İnsan aqları boyunca BMT Yuqarı komissarı İdaresinde aşkâr etilgen BMT esabatında.
«Ukrain teşebbüsçileri tarafından başlanılğan Qırımnıñ mal qamaçavı sebebinden insan aqları bozuldı, bu bozuluvlar uquq qoruyıcı organlarınıñ hadimleri tarafından baqılmalı», – denile maruzada.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Uquq qoruyıcılar qamaçav iştirakçileri tarafından insan aqlarınıñ bozuluvı aqqında defalarca bildirgen edi.
Herson vilâyetinde Milliy politsiya baş idaresiniñ taqiqat idaresi bildirgeni kibi, Qırım qamaçavı devam etken vaqıt içerisinde politsiya 186 vaqianı qayd etti, olardan 38 Mahkemeden evel taqiqatlarnıñ yekâne cedveline kirsetildi.
