Link açıqlığı

Advokat: İslâmovanıñ evinde tekrar tintüvni Qırım qamaçavı idarecisiniñ işi çerçivesinde keçirdiler


Qırım advokatı Cemil Temişev ATR qırımtatar telekanalınıñ sabıq baş müdiri Elzara İsâlmovanıñ evinde dekabr 9 künü keçirilgen tintüvde bulundı. Onıñ aytqanı kibi, Qırımda yarımada qamaçavı idarecisi Lenur İslâmovğa nisbeten açılğan cinaiy işniñ çerçivesinde keçirilgen tintüvdir.

Bu aqta o Qırım.Aqiqatqa bildirdi.

«E, tintüvde bar edim. Lenur İslâmovğa nisbeten açılğan cinaiy işniñ çerçivesinde keçirildi. Tintüv devamında bozuluvlar qayd etilmedi. Keldi, baqtılar. Taqiqatçınıñ aqqıdır, kerek dese, er kün tintüvlerni keçire bile», – dedi advokat.

Onıñ sözlerine köre, advokat olaraq bu vaziyette tintüvni keçirgenlerge itirazı yoq: «Er şey doğru. Qıdırğan şeylerni tapmadılar. İslâmovnıñ faaliyeti ile bağnı tasdiqlağan nasıldır bir vesiqalarnı qıdırğanlar, belki, öyle tüşünem», – qayd etti Temişev.

O, tintüvniñ «adetiy sürette» keçirilgenini bildirdi.

ATR qırımtatar telekanalınıñ baş müdiriniñ sabıq muavini Lilâ Bucurova bildirgeni kibi, dekabr 9 künü Qırımda zenaatdaşı Elzara İslâmovanıñ evinde tintüv keçirdiler.

Qırım.Aqiqat İslâmova ile bağlanmağa tırıştı, amma o telefonğa cevap bermey ve tintüvni izaatlamay.

Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.

Ukraina Tış işler nazirligi Qırımda insan aqlarınıñ bozuluvı boyunca eki cinaiy işni açtı.

XS
SM
MD
LG