Qırımtatar Milliy Meclisiniñ reisi, Ukraina halq deputatı Refat Çubarov Qırım energetik qamaçavınıñ devam ettirilmesi mümkün olğanını bildire. Bu aqta o Yuqarı Rada toplaşuvında dekabr 9-da bildirdi.
«Tek eki aftağa (teneffüs – QA), ükümet ve akimiyet Herson vilâyetiniñ energetik teminlevini yerine ketirilmesi boyunca işlerni soñunace yapsınlar dep», – qayd etti o.
Çubarov qamaçav iştirakçileriniñ Qırımğa elektrik energiyasınıñ berilmesi aqqında añlaşma ile bağlı talaplarını hatırlattı.
«Menimce, bu zal, zenaatdaşlarım, iç bir nazir, ükümetke elektrik energiyasınıñ berilmesi aqta añlaşmalarnı qabul etmege imkân bermez, bunı yapmağa kerek olsa, vesiqalarda «Qırım Muhtar Cumhuriyeti, Ukraina» yazılmalı», – qayd etti o.
Qıtaiy Ukrainadan işğal etilgen Qırımğa elektrik energiyasını bergen yolaqlardan biri «Kahovka – Titan» yolağı elektrik energiyasına bağlandı.
Yaqında Qırım qamaçavı ştabınıñ reberi Lenur İslâmov ştab «Ukrenergo»ğa «Kahovka-Titan» elektrik yolağını Qırımğa ceryannı bermek içün tamamınen azırlamağa ruhset bergenini bildirdi. Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarovnıñ sözlerine köre, faaller tamirlengen elektrik yolağını qullanmağa fırsat berirler. Dekabr 7 künü «Pravıy sektor» ve «Aydar» temsilcileri bunıñ ile razı olmağanlarını ve aktsiyada artıq iştirak etmeycegini bildirdiler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqlаdı.
