Kiyevde dekabr 8 künü aqşam bir 20 insan, Qırım qamaçavı iştirakçileriniñ temsilcileri, Kiyevde Ukraina prezidenti memuriyetiniñ binası yanında toplanıp, ukrain devleti başına faalleriniñ Qırım strategiyası aqqında noqtaiy nazarını bildirmege niyet etkenler.
Aktsiya teşkilâtçısı Qırım «vatandaşlıq qamaçavınıñ» faali Gayde Rizayeva edi. Aytqanı kibi, faaller Qırım meselesiniñ Minsk añlaşmalarına qoşulacağına ümüt besleyler.
«Bu qamaçavda ilk evelâ siyasiy mabüslerimizniñ azat etilmesini talap etemiz. İşğal etilgen Qırım territoriyası ne içündir alâ daa Minsk añlaşmalarına qoşulmağan, «DHC» ve «LHC» qoşulğanı kibi. Ne içün Qırımnı Minsk añlaşmalarına qoşıp olamaymız?» – dey Gayde Rizayeva.
Faaller Petro Poroşenkodan suallerge cevapnı üç kün bekleyler, bu talapnı aktsiyanıñ esas maqsadı olaraq qayd eteler.
«Bir elektrik yolağını işlettirdiler. Ebet, çoqumız bunıñ ile razı degilmiz. Siyasetçilerimizni añlaymız, bunı yapmağa mecbur etken dünya toplulığı bar, amma siyaset ve halqnı adaştırmamağa rica etemiz. Halq bunen razı degil, biz, faaller kibi, qaza vaqtında bütün tamir işlerine keder ete edik», – dey Rizayeva.
«Avtomaydan – Kiyev» teşkilâtınıñ idarecisi Dmitriy Karp, prezident memuriyeti binası yanında keçirilgen aktsiyağa qoşulıp, ukrain ükümetine Qırım energetik qamaçavı meselesinde ğarbiy memleket liderleri basqı kösterdi.
«Bugün Yuqarı Radağa qarar kirsetildi, oña köre, elektrik teminlevi devlet seviyesinde toqtatılmalı. Devletimiz bir şey yapsın, deputatlarımznıñ areketlerine baqarmız», – qayd etti Karp.
Qıtaiy Ukrainadan işğal etilgen Qırımğa elektrik energiyasını bergen yolaqlardan biri «Kahovka – Titan» yolağı elektrik energiyasına bağlandı.
Yaqında Qırım qamaçavı ştabınıñ reberi Lenur İslâmov ştab «Ukrenergo»ğa «Kahovka-Titan» elektrik yolağını Qırımğa ceryannı bermek içün tamamınen azırlamağa ruhset bergenini bildirdi. Qırımtatar Milliy Meclisiniñ reisi, Ukraina Yuqarı Radasınıñ deputatı Refat Çubarovnıñ sözlerine köre, faaller tamirlengen elektrik yolağını qullanmağa fırsat berirler. Dekabr 7 künü «Pravıy sektor» ve «Aydar» temsilcileri bunıñ ile razı olmağanlarını ve aktsiyada artıq iştirak etmeycegini bildirdiler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqlаdı.
