Link açıqlığı

«Lâle» qırımtatar telekanalı Qırımda işine devam ete bile. Bunı Qırımnıñ Rusiye başı Sergey Aksenov dekabr 8 künü «Tatlı ses» bala istidat yarışınıñ teşkilâtçı ve iştirakçileri ile körüşüvde bildirdi.

«Er kesnen laf ettik, istisnasız, kanal litsenziyasını alacaq», – dep bildirdi Qırım.Aqiqatqa Aksenovnıñ sözlerini körüşüv iştirakçilerinden biri.

Qırımnıñ Rusiye baş naziri Sergey Aksenov Facebookta yazğanı kibi, «Tatlı ses» bala istidat yarışınıñ ğaliplerine ediyelerni berdi: turistik ziyaret sertifikatlar.

«Yaş qırımlılarımızğa qol tutacaqmız. Olarğa ileride de yardım etmege, inkişaf imkâniyetlerini yaratmağa tırışacaqmız, bir başlanuv kerek. Balalarımızğa özlerini tapmağa yardım etmelimiz… Leyha reberi Liliya Rustemovna Bucurovağa işbu tedbirniñ keçirilmesi içün teşekkür bildirem. İşbu festivalni ileride de inkişaf ettirmek ve Vatanımız – Rusiyeniñ seviyesine çıqmaq kerek», – denile beyanatta.

2015 senesi aprel 1-den dünyada yekâne ATR qırımtatar telekanalı, «Lâle» bala telekanalı, «Meydan» radiosı Roskomnadzor litsenziyasını alalmayıp, işğal etilgen Qırımda yayınlavını toqtatmaq mecbur oldı. İyün 17-den ATR ve «Lâle» Kiyevden yayınlavına devam etti, «Meydan» internette çalışmağa başladı.

ATR «Tatlı ses» bala yarışını 8 yıldır keçire. Esas teşkilâtçı vazifesi «Lâle» kanalında edi. «Tatlı ses»niñ bu senedeki şiarı: «Show must go on» edi.

XS
SM
MD
LG