Qırım energetik qamaçavı toqtatılmasına qarşı çıqqanlar salı künü, dekabr 8-de, Kiyevde Ukraina prezidenti memuriyeti yanında narazılıq numayışını keçirip, «Qırım meselesini» Minsk añlaşmalarına qoşmağa talap etecek olalar.
Bu aqta Qırım.Aqiqatqa aktsiya teşkilâtçısı Gayde Rizayeva bildirdi.
«Muayyen talaplarımnı bildirerim. Bu tedbirniñ teşkilâtçısı olam… Prezident ile körüşüvde israr etecegim, çünki bunı er alda etmek kerek. Prezidentten ğayrı, bunı kimse etmez. Qırım Minsk añlaşmalarına qoşulğanında bu er şeyni yapmağa daa da qolay olur. Biznen o vaqıt oynmaycaqlar», – dedi o.
Rizayevanıñ aytqanına köre, aktsiya iştirakçileriniñ tam miqdarı daa belgisiz. Qayd etkeni kibi, «Pravıy sektor», «Aydar»dan balalar olacaq, Maydan iştirakçileri, «Avtomaydan».
Faali dey ki, insanlarnıñ siyasetçilerden közü qaytqan, «bizden de közleriniñ qaytmasına» yol bermemek kerek. «Fikrim – siyasetçi ve halq, aytılğanı kibi, farqlı aqımlardır», – qayd etti Rizayeva.
Meclis yetekçileriniñ ve devlet başınıñ elektrik yolağınıñ işlettirilmesi aqqında añlaşmalarını izaatlap, buña qatiyen qarşı olğanını bildirdi. «Menimce, kerçekten de bir, eki, atta bütün pıtaqlarnı işlettirmege mümkün edi, amma biz bir şeyge kelse ve onıñ (Rusiye – QA) aqiqiy areketlerini körse edik. Şimdi ise irade kösterilmesi kibi ola», – dedi aktsiya iştirakçisi.
Sözlerine köre, Meclis reisi Refat Çubarov ve qamaçav idarecisi Lenur İslâmovğa prezident memuriyeti yanında keçirilecek narazılıq numayışı aqqında bildirdi.
Qırım qamaçavınıñ diger temsilcileri ve ukrain akimiyetiniñ izaatı şimdilik daa yoqtır.
Gayde Rizayeva – Qırımdan mecburen köçip kelgen Yevromaydan faali. Qırım işğalinden evel 10 yıl devamında mahkemede çalıştı ve «Qırım Muhtar Cumhuriyetiniñ nam qazanğan adliyecisi» unvanını elde etti. Bıltır iyün ayında «LHC» blokpostında yaqalandı ve üç buçuq ay devamında esirlikte yaşadı. Reinelerniñ deñişmesi ile oğraşa ve Donbassqa yardımnı alıp bara.
Yaqında Qırım qamaçavı ştabınıñ reberi Lenur İslâmov ştab «Ukrenergo»ğa «Kahovka-Titan» elektrik yolağını Qırımğa ceryannı bermek içün tamamınen azırlamağa ruhset bergenini bildirdi. Qırımtatar Milliy Mecelisiniñ reisi, Ukraina Yuqarı Radasınıñ deputatı Refat Çubarovnıñ sözlerine köre, faaller tamirlengen elektrik yolağını qullanmağa fırsat berirler. Dekabr 7 künü «Pravıy sektor» ve «Aydar» temsilcileri bunıñ ile razı olmağanlarını bildirdiler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.
