Link açıqlığı

Saatnıñ esas haberi

Çubarov: Aksenovnıñ Qırımnıñ ukrain elektrik energiyasına tabi olmağanı aqqında lafı – yalan


Qırımtatar Milliy Meclisiniñ reisi Refat Çubarov Qırımnıñ Rusiye başı Sergey Aksenovnıñ Qırım artıq qıtaiy Ukraina elektrik teminlevine tabi olmağanı aqqında lafını «yalan» dep adladı.

«O (Aksenov – QA) Qırım ve başqa toplulıqlarğa sıñırsız bir hayalperest insan olaraq belli oldı. Öz iç bir sözüni, tahminini yerine ketirmegen bir insan kibi. Aytqanı yalandır», – dedi Çubarov Qırım.Aqiqat Radiosınıñ efirinde dekabr 8 künü.

Çubarovnıñ sözlerine köre, Qırımğa ukrain elektrik energiyasınıñ berilmesi yarımadağa qamaçavdan evel berilgen miqdardan tek 25% teminlengen.

Bunıñ ile Meclis reisi 2016 senesi yanvar 1-den Qırım kene Ukraina energetik tertibatından söndürile bilecegini qayd etti, Ukraina Yuqarı Radasınıñ mütenasip qararı olsa.

«Böyle alda mesuliyet Ukraina Yuqarı Radasına yüklenecek», – dedi Çubarov.

Qırımnıñ Rusiye başı Sergey Aksenov aytqanı kibi, Qırım akimiyeti Ukraina ile elektrik energiyası meselelerinde artıq işbirlik etmeycek.

Qıtaiy Ukrainadan işğal etilgen Qırımğa elektrik energiyasını bergen yolaqlardan biri «Kahovka – Titan» yolağı elektrik energiyasına bağlandı.

Yaqında Qırım qamaçavı ştabınıñ reberi Lenur İslâmov ştab «Ukrenergo»ğa «Kahovka-Titan» elektrik yolağını Qırımğa ceryannı bermek içün tamamınen azırlamağa ruhset bergenini bildirdi. Qırımtatar Milliy Mecelisiniñ reisi, Ukraina Yuqarı Radasınıñ deputatı Refat Çubarovnıñ sözlerine köre, faaller tamirlengen elektrik yolağını qullanmağa fırsat berirler. Dekabr 7 künü «Pravıy sektor» ve «Aydar» temsilcileri bunıñ ile razı olmağanlarını bildirdiler.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.

Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.

XS
SM
MD
LG