«Qırım qamaçavı» gruppasına birleşken «Pravıy sektor» faalleri yarımada energetik qamaçavı boyunca aktsiyada iştirakini toqtatqanları aqqında bildireler. Bu aqta faallerniñ Facebooktaki bildirüvinde aytıla.
«Biznen ve Lenur İslâmovnıñ reberligi altındaki «Qırım maydanı» ştabına kirgen göñülli batalyon, vatanperver areketler ve cemaaat teşkilâtlarınıñ temsilcileri ile uyğunlaştırılmağan Qırımtatar Milliy Meclisiniñ beyanatı Ukraina tış ve iç duşmanlarına yol bere», – denile beyanatta.
Faallerniñ aytqanı kibi, küçlerini işğal etilgen Qırım ile sıñırdaş yolağına avuştıralar.
«Rusiyeniñ soñ künleri «Qırım qamaçavı» aktsiyasınıñ neticelerine reaktsiyasını közetip, ukrain arbiyleriniñ ve yarımada qamaçavı iştirakçileriniñ nezaret-kiriş noqtaları yanında arbiy tehnika ve insan resurslarınıñ büyük miqdarını köremiz. Böyle şaraitlerde «Pravvıy sektor» «Qırım maydanı» çerçivesinde qamaçav iştirakini toqtata, arbiy bölüklerimiz ukrain sıñırını işğal etilgen Qırım ile yanında qoruğan Ukraina Silâlı Quvetleriniñ arbiylerine yardımğa yönelecek», – deyler faaller.
Yaqında Qırım qamaçavı ştabınıñ reberi Lenur İslâmov ştab «Ukrenergo»ğa «Kahovka-Titan» elektrik yolağını Qırımğa ceryannı bermek içün tamamınen azırlamağa ruhset bergenini bildirdi. Qırımtatar Milliy Mecelisiniñ reisi, Ukraina Yuqarı Radasınıñ deputatı Refat Çubarovnıñ sözlerine köre, faaller tamirlengen elektrik yolağını qullanmağa fırsat berirler. Dekabr 7 künü «Pravıy sektor» ve «Aydar» temsilcileri bunıñ ile razı olmağanlarını bildirdiler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.
