Qırımtatar Milliy Meclisiniñ reisi Refat Çubarov sentâbr ayında Herson vilâyetinde yarımada ile memuriy sıñırda başlanğan Qırım mal qamaçavını «muvafaqiyetli» adladı.
Bu aqta o Qırım.Aqiqatqa dekabr 8 künü bildirdi.
Çubarov şunı qayd etti ki, yarımada erzaq qamaçavı Ukraina ükümetini işğal etilgen yarımada ile ticaretni bütünley toqtatmağa qarar almağa mecbur etti.
Meclis reisi aytqanı kibi, qamaçavnıñ bütün maqsatları yerine ketirilmedi.
«Siyasiy mabüslerni azat etip olamaymız, Qırımda insan aqlarını ziyaret etecek halqara eyyetlerniñ bulunmasını qazanıp olamaymız», – dedi Çubarov.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
