Qırım qamaçavı boyunca aktsiya iştirakçileriniñ ştabı «Ukrenergo» brigadasıa «Kahovka-Titan» yolağını Qırımğa elektrik ceryanınıñ berilmesine azırlamağa imkân berdi, amma aktsiya iştirakçileri bildirgeni kibi, Qırım ile memuriy sıñırda qalıp, «kerginliksiz turğan diger yolaqlarnı qoruycaqlar».
Qırım.Aqiqatqa aktsiya ştabınıñ reberi Lenur İslâmov aytqanı kibi, dekabr 8 künü Ukraina Yuqarı Radasında Qırımnıñ elektrik teminleviniñ toqtatılması aqqında qanun leyhası baqılacaq. Sözlerine köre, energetiklerge «Kahovka-Titan» yolağına irişimni açıp, aktsiya iştirakçileri «terrorist olmağanını köstere» ve halq deputatlarından muayyen qararlarnı bekley.
«Turğanımız kibi turamız. Diger yolaqlarnı işlettirmeymiz. Dünya toplulığına terrorist olmağanımıznı kösterdik, öz memleketimizdemiz, cinayetçi degilmiz, yarıqnı bere bilemiz. Şimdi Ukraina parlamenti ne ete bilgenini qanuniy sürette kösteriñ. Yarın parlamentte kim nasıl tarafta turğanını körermiz. Çünki bizni tenqit etmege, qabaatlamağa pek yahşı. Öz mevamını köstersinler», – dey İslâmov.
O şunı da qayd etti ki, dekabr 31-de «Rusiye federal okrugı Qırımğa» elektrikniñ berilmesine muqavele müddeti bite» ve bu añlaşmanıñ devam ettirilmeycegine ümüt besley.
Aynı zamanda «Pravıy sektor» temsilcileri «Kahovka-Titan» yolağı qurşavınıñ alıp taşlanılmasını alğışlamay.
«Pravıy sektor» buña qarşı çıqa. Amma «Pravıy sektor» temsilcisi kibi Qırım qamaçavı ştabında qalam. Akimiyetke siyasiy basqı aqqımıznı özümizde qaldıramız, talaplarımıznı eşitsinler, siyasiy, qanun çıqarıcı seviyede cemaat teşebbüsimiz baqılsın. Ukraina devletiniñ mustaqilligi ve topraq bütünliginiñ qorulması içün mında arbiy bölüklerni kirsetmege aqqımıznı da qaldıramız», – dedi özüni «Qırım qamaçavı» arbiy-siyasiy ameliyatınıñ acele ştabınıñ reberi Horvat olaraq tanıtqan adam.
«Ukrenergo» şirketinde bildirilgeni kibi, dekabr 7-de, Ukraina energetika ve kömür sanayı Nazirliginiñ, uquq qoruyıcı organlarınıñ temsilcileri ve Qırımtatar Milliy Meclisiniñ yolbaşçılığı ile muzakerelerniñ neticesinde «kerginlikniñ ğayrıdan berilmesine elektrik yolaqlarınıñ azırlav işleriniñ soñunace becerilmesi aqqında añlaşma qabul etildi».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.
