Qırım energetik qamaçavı boyunca aktsiya iştirakçileri yarımada qamaçavını çoq tutıp olacaqlarını hayal etmediler. Bunı Qırım.Aqiqat Radiosınıñ aqşam efirinde yarımada qamaçavı aktsiyasınıñ idarecisi Lenur İslâmov bildirdi.
«Tabiiy ki, ertemi-keçmi resmiy Kiyev içün nasıldır bir kerileme etmege kere olacağını añlay edik. Ukraina akimiyeti, işğalci akimiyet ya da Moskva akimiyeti arasında, tahmin etmege bile qorqam, bazı bir añlaşmalar, nasıldır bir şeylerniñ bar olğanını añlaymız. Şunıñ içün energetik qamçavını çoq tutacaqmız dep hayal etmey edik», – dedi İslâmov.
Aytqanı kibi, Qırım energetik qamaçavı yerli sakinlerge yarımadanıñ qıtaiy Ukrainağa bağlı olğanını kösterdi.
«Onı tuttıq. Onı yapa bilecegimizni kösterdik», – qayd etti İslâmov.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.
