Qırım Rusiye ükümetiniñ başı Sergey Aksenov dey ki, yarımada akimiyeti Ukraina ile elektrik teminlevi saasında kene işbirlik qurmağa niyet etmey eken, haber ete Qırım Rusiye akimiyetiniñ «ruporı» «Krıminform» saytı.
«Olar qurucılıq malzemeleriniñ berilmesini yarım yıl evelsi, erzaqnıñ – üç ay evelsi toqtattılar, suvnı eñ başında qapattılar. Elektrik energiyası – bizni Ukraina ile bağlağan soñki yip edi. Bugün bütünley kesilgenmiz ve bu munasebetlerni devam ettirmege istemeymiz», – dedi Aksenov.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.
