«Ukrenergo» şirketinde bildirilgeni kibi, dekabr 7-de, Ukraina energetika ve kömür sanayı Nazirliginiñ, uquq qoruyıcı organlarınıñ temsilcileri ve Qırımtatar Milliy Meclisiniñ yolbaşçılığı ile muzakerelerniñ neticesinde «kerginlikniñ ğayrıdan berilmesine elektrik yolaqlarınıñ azırlav işleriniñ soñunace becerilmesi aqqında añlaşma qabul etildi».
«Ukrenergo» saytında bildirilgeni kibi, 220 kV Kahovka-Titan yolağınıñ işlettirilmesi, ilk evelâ, Herson vilâyetiniñ eki rayonına elektrik teminlevini qaytarır.
Bunıñ ile şunı da qayd eteler ki, podstantsiya «soñki afta devamında bir qaç sefer qazaiy şekilde söndürile edi».
«Yolaqnıñ işlettirilmesi – Herson ve Nikolayev vilâyetleriniñ energetik teminlevini yerine ketirgen «Kahovka» stantsiyasınıñ normal çalışmasına ilk adımdır», – denile beyanatta.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.
