Link açıqlığı

Qırımda istidatlı balalar içün eski türk litseyine bala evlerinden balalarnı ketirip yerleştireler


Qırımnıñ Bağçasaray rayonı Büyük Süyren köyündeki istidatlı balalar içün eski türk litseyi mecburiy tatillerge qapalı, bu vaqıtta oquv yurtunıñ territoriyasına Keriç ve Alupka bala evlerinden balalarnı ketireler. Bu aqta Qırım.Aqiqatqa talebelerniñ ana-babaları tarif ete.

Ana-babalarnıñ malümatına köre, litseyniñ şahsiy elektrik teminlevi bar. Aytqanı kibi, «türkler muayyen problemlerniñ ola bilecegini tahmin etip, ketmezden evel litsey içün generatorlarnı satın alğan edi», böyleliknen, litseyde derslerniñ devam etmesi mümkün edi.

Bunıñ yerinde talebelerni tatillerge yolladı, binağa ise Keriç ve Alupka bala evlerinden balalarnı ketirdiler.

Talebelerniñ ana-babaları aytqanına binayen, Alupka internatına generator berilgen edi, şunıñ içün balalarnı avuştırmağa sebep yoq edi.

«Litsey talebelerini şimdi qaytarmaylar, çünki Büyük Süyrendeki litseyniñ infrastrukturası yahşı. Litseyni acele qapatıp, balalarnı Qırım mektepleri boyunca dağıtmağa isteyler, ğaliba. Litseyniñ qızlar içün Aqmescitteki bölüginde ise dersler endi başlandı», – dey litsey talebesiniñ babası.

Ana-babalar Qırım Nazirler şurasına telefon etken ediler, amma cevapnı almadılar.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.

Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.

Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.

XS
SM
MD
LG