Saq şeeri boyunca Rusiye Taqiat komitetiniñ Baş taqiqat idaresiniñ bölügi Saqta yüz bergen yanğın neticesinde üç balannıñ ölümi ile bağlı teşkerüvni keçire. Bu aqta bölükniñ matbuat hızmeti bildire.
«2015 senesi dekabr altısından yedisine keçer gecesi Saq şeerinde yanğın yüz berdi, neticede üç çağına yetmegen bala elâk oldı, evden üç insan çıqıp oldı – eki büyük adam ve bir bala. Al-azırda Qırımnıñ hastahanelerine ketirilgenler», – denile beyanatta.
Olğan malümatqa köre, yanğın gaz qızdıruv aletleriniñ qullanuvı ile bağlı. Al-azırda vaqianıñ şaraitleri ögrenile.
Qırım qurtarıcı hızmetleri elektrik ciyezlerini muqaytlıqnen qullanmağa çağırğan edi. Vaziyetni evlerde qızdıruv olmağanı ve fevqulâde vaziyet saqlanılğanı kerginleştire
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım qamaçavı teşebbüsçileri dekabr 6 künü qıtaiy Ukrainadan yarımadağa elektrikniñ bir yolaq vastası ile berile bilecegi aqqında bildirgen ediler. Bunı Ukraina prezidenti Petro Poroşenko tasdiqaldı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
