Aqmescitte dekabr 6 künü Akademik muzıkalı teatrinde (sabıq Qırım akademik ukrain muzıkalı teatri) «Tatlı ses» istidat yarışı iştirakçileriniñ gala-kontserti keçti.
Qırım.Aqiqat mühbiri bildirgeni kibi, yarış endi sekizinci kere keçirile. Bu sene balalar «yır» ve «oyun» namzetliginde yarıştılar.
Kontsert tantanalı şekilde keçti. Artistler ve seyirciler tedbirge azırlanıp, kiyimlerinde qırımtatar milliy kostüminiñ elementlerini qullandı, fes, qalpaq, quşaq kibi.
Kontsertni Qırım Rusiye başı Sergey Aksenov da ziyaret etti. Eñ başında selâmlav sözü ile çıqışta bulunıp, salonnı terk etti.
«Şahsen men eminim, bugün mında çıqışta bulunacaq balaçıqlar arasında Qırımnı bütünrusiye yarışlarında temsil etecek balalar tapılır. Öz adımdan «Tatlı ses» festivaliniñ teşkilâtçılarına Bucurova Lilâ Rustemovna ve maliye destekni köstergen bütün sponsorlarğa minnetdarlığımnı bildirmege isteyim. Biz endi Medeniyet nazirligi, Tasil nazirligine bu tedbirniñ keçirilmesine qol tutmağa avale ettik. Kelecek sene, eminim, bar küçümiz ile onı aynı böyle şekilde azırlarmız. Qıyınlıqlarğa baqmadan, festivalni keçirmege qarar alğan teşkilâtçılar sağ olsun», – dedi o.
Aksenov bu sene birinci üç ğalipke ayrı bahşışlarnı ediye etmege söz berdi.
Qırım müftisi Emirali Ablayev merasimniñ iştirakçi ve teşkilâtçılarına muracaat etip, şöyle dedi: «Ebet, er bir halqnıñ ağır künleri ola, amma olar keçer ve baht künleri kelip, «Tatlı ses» kibi».
Teşkilâtçılar Elzara İslâmova ve Lilâ Bucurovağa minnetdarlığını bildirdi: «Mında bulunmaq, yırlamaq ve oynamaq – pek yahşı, amma bu bayramnı keçirmek içün bu eki qadın Elzara ve Lilâ hanımnıñ neler körgenlerini bilse ediñiz, bunı unutmamaq kerekmiz. Baş egmege aqqıñız yoq, ayaqlarıñızda eminliknen turmalısıñız, çünki ögümizde bizni daa çoq bayram bekley».
«QARA DENIZ PRODACTION» baş müdiriniñ muavini böyle ayttı: «Balalarımızğa baqıp,eñ sessiz soyu yırlar ve ayaqsız soyu oynar. Ağır zamanlar ve qara künlerni insanlar özleri yapa, biz balalarımız içün bunı etmeycekmiz. «Tatlı ses» yaşaycaq! Tünevin edi, bar bugün ve yarın olacaq!»
Gala-kontsertniñ iştirakçileri yarış teşkilâtçıları ve sponsorlardan bir çoq bahşış elde etti.
