Qırım qamaçavında iştirak etken «Pravıy sektor» vekilleri «Ukrenergo» işçilerine Qırımğa yetken elektrik yolaqlarını işlettirmege imkân bermey. Bu aqta Qırım.Aqiqatqa devlet şirketinde bildirdiler.
«Şimdi blok eteler. Tamir brigadalarımız işke başlap olamay», – deyler «Ukrenergo» matbuat hızmetinde.
«Pravıy sektor» saytında teşkilâtnıñ Herson vilâyetinde bir elektrik yolağınıñ işlettirilmesi aqqında añlaşma boyunca beyanatı aşkâr etilgen.
«Bugün gece oligarh Firtaşnıñ «Titan» zavodına yetken energetik ağlarınıñ birini tamirleycek ediler. İçki İşler Nazirligi ve Ukraina havfsızlıq hızmeti temsilcileri ile kelgen işçiler Poroşenko ile Qırım qamaçavı iştirakçileriniñ bir qısmı arasında olğan añlaşmalarğa köre elektrik yolağını işlettirecek ediler. «PS» üç acele gruppası «Hammer» – «PS» ekinci yedek batalyonınıñ komandanı – yolbaşçılığı altında «Aydar» faalleri ile birlikte cinaiy areketlerge ve işğal etilgen territoriyağa elektrik energiyasınıñ berilmesine keder etti», – denile beyanatta.
«İlân etemiz: elektrik energiyasınıñ berilmesi ğayrıdan tiklense, «Pravıy sektor» «Qırım qamaçavı» cemaat aktsiyasında iştirakini toqtatır, çünki böyle «qurşav»nıñ manasını körmey», – qayd ettiler teşkilâtta.
«Pravıy sektor» nezaretni «başqa şekilde» keçirmek ve Qırımğa yük ve resurslarnıñ kirsetilmesine imkân bermemek niyeti aqqında bildire.
Ukraina prezidenti Petro Poroşenko yaqın vaqıtta Qırım ile memuriy sıñırda tamirlengen elektrik yolaqlarında energiyanıñ berilmesi ğayrıdan başlaycağına ümüt besley.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
