Link açıqlığı

«Mayıs 3 işi» iştirakçilerinden biri Edem Osmanov bir yıllıq şartlı apis cezasına maküm etildi, dep bildirdi Qırımtatar Milliy Meclisiniñ reis muavini Nariman Celâl.

«Bugün Ermeni Bazar şeer mahkemesinde «mayıs 3 işi» iştirakçi Edem Osmanovğa qarar seslendirildi. Prokuror eki yıllıq apis cezasını talap etken edi, amma mahkeme bir yıllıq şartlı tevqif ükmüni belgiledi. Dekabr 6 künü mında Tair Smedlâyevniñ işi baqılacaq», – yazdı o Facebookta.

Qırımda 2014 senesi mayıs 3-de qırımtatarlarnıñ lideri Mustafa Cemilevni qarşılav vaqtında uquq qoruyıcı organlar hadimlerine zarar ketirüvde şeklengen qırımtatar faalleri Tair Smedlâyev ve Edem Osmanovnıñ işleri boyunca evelki mahkeme toplaşuvı oktâbr 27-de oldı.

Qırımtatar faali Tair Smedlâyev Rusiye uquq qoruyıcıları tarafından Eski Qırımda 2014 senesi oktâbr 22 künü yaqalandı. Bıltır dekabr ayında apis cezasını kefaletke deñiştirdiler.

Edem Osmanovnı 2015 senesi yanvar 19 künü yaqaladılar. Yanvar 21-de mahkeme onı eki aylıq apis cezasını maküm etti. Fevral 25 künü Osmanovnı kefalet boyunca SİZOdan azat ettiler.

Evel Qırımnıñ Rusiye prokuraturası bildirgeni kibi, Ermeni Bazar şeer mahkemesi Aqmescit rayonı 45 yaşında Edem Ebulisovnı «mayıs 6 işi» boyunca qabaatlı tanıdı, oña 40 biñ ruble miqdarında para cezası berildi.

XS
SM
MD
LG