Qırımtatar Milliy Meclisniñ reisi Refat Çubarov aytqanı kibi, qıtaiy Ukrainadan Qırımğa elektrikniñ berilmesi ile bağlı añlaşmalar yarımadanıñ Ukrainağa ait olğanı aqqında qaydlarsız imzalanılmaz.
Bu aqta o dekabr 6 künü Kiyevde matbuat konferentsiyası devamında bildirdi.
Çubarovnıñ sözlerine köre, Qırımğa elektrikniñ «Kahovka-Titan» yolağı boyunca berilmesini nazarda tuta ve Ukraina Rusiye ile nasıl bir añlaşmalarnı imzalaycağını nezaret etecek.
«2016 senesine elektrik teminlev aqqında añlaşmada Qırım Ukraina qısmı olğanı aqqında bir şey yazılmasa, işbu añlaşmanıñ imzalanuvına yol bermemek tırışacaqmız», – dey o.
Çubarovnıñ aytqanı kibi, «Kahovka-Titan» yolağınıñ quveti eñ zayıf olğanı sebebinden işbu yolaq işlettirile bile.
«Teessüf ki, o (Qırım akimiyeti – QA) bunı yapmaycaq, energiyanı arbiy qısımlar, Qırımda arbiy tehnikağa yollaycağını tüşünemiz», – dey Çubarov.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
