Qırımda energetik teminlevi ile bağlı meselelerden sebep ilân etilgen mektep tatilleri dekabr 7-de bitecek. Bunı cuma künü, dekabr 4-de, Qırım Rusiye Devlet şurasınıñ reisi Vladimir Konstantinov bildirdi.
Aytqanı kibi, afta başında bütün qazan daireleri işlep başlaycaq, ve Qırımda tasil berüv ketişatı devam eter.
Qırımıñ bir sıra regionlarında umumtasil ve mektepten evel tasil müessiselerinde oquv ketişatı dekabr 6-na qadar toqtatılğan edi.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
