Mustafa Cemilevniñ evine ve Lenur İslâmovnıñ «SimCityTrans» şirketine yarımada qamaçavı başında yımırta atqan Rusiye tarafdarı Eyvaz Ümerovnıñ arqadaşları İslâmovnıñ evine «Molotov qarışmalarını» atmağa ıntıldı. Bunı Aqmescitte matbuat konferentsiyasında Meclisniñ muhalifet küçleriniñ tarafdarı Eyvaz Ümerov bildirdi, dep haber ete QHA.
Ümerovnıñ sözlerine köre, böyleliknen gençler yarımada energetik qamaçavına cevap berecek ediler.
«Evime eyecanlı gençler kele edi. Bağçasarayda bir qaç flash-moblarnıñ teşebbüsçisi edim, Lenur İslâmovnıñ «SimSitiTrans» şirketi yanında, oña taba yımırta atıla edi. İnsanlar Lenur İslâmovnıñ Qırımda yaşağan yeri, evi aqqında soray ediler: «Amma bu sefer yımırta degil de, Molotov qarışmasını atar edik». Yaşlarnı tınçlandırmaq içün ğayet areket etmege mecbur oldım, yaqında bu mesele çezilecegine işandırıp», – dey Ümerov.
Matbuat konferentsiyasında Rusiye tarafdarı qırımtatar teşkilâtlarınıñ temsilcileri qırımtatar yaşlar forumını toplap, mında Mustafa Cemilev, Refat Çubarov ve Lenur İslâmovnıñ yarımada vatandaşlıq qamaçavı ile bağlı areketlerini takbih etecek olğanlarını bildirdiler.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
