Qırım Rusiye devlet şurasınıñ başı Vladimir Konstantinov Ukraina sakinleriniñ yarıqsız qalğan qırımlılarğa duyğudaşlığı olmağanını takbih etti.
«Adiy ukrainler içün can ağıra, ukrain hazinesine bergi ödegen ve saf şekilde çalışqan qırımlılarğa nisbeten atta duyğudaşlıq ve qol tutuv kibi bir şey köstermegenler. Belâmızğa iç te duyğudaşlıq is etmediler», – dedi o dekabr 4 künü Devlet şurasınıñ sessiyasında.
Aytqanı kibi, qırımlılar «evlerinde, bala bağçaları, mekteplerde buzlağan, derslerni qaçırğan balalarnıñ, esli başlı insanlarnıñ zorluq çekkenini» iç bir vaqıt unutmazlar.
«Bunı iç bir vaqıt unutmamız. Eminim, balalarımız da unutmaz», – dedi o.
Bundan evel dekabr 4 künü toplaşuvda çıqışta bulunıp, Konstantinov yarımada sakinlerine balalarğa «Generator» adını bermege teklif etti.
Qırımda şimdi dizel-generatorlar eñ satılğan donatuvdır. Generatorlarnı tükân, berberhane, çeşit şirket ve şahsiy evler saipleri satın ala.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
