Link açıqlığı

Rusiye Fevqulâde işler nazirligi dekabr 3 künü Qırımğa İl-76 uçağı vastasınen 7,5 kilovatt quveti ile 40 mobil generatornı ve 500 kilovattlı bir generatornı yolladı. Çadır ve suv içün rezervuarlar da ketirildi.

Bu aqta Rusiye Fevqulâde işler nazirliginiñ matbuat hızmeti bildire.

«Bütün bu ciyezler Qırım ealisiniñ yaşayışını elektrik energiyasınıñ qıtlığı şaraitlerinde teminlemek içün ketirildi. Generatorlar bağ obyektlerine elektrik energiyasınıñ daimiy sürette berilmesi içün işlettirilecek, çadırlar – meskün yerlerde yaşayış teminlev şeerçikleriniñ açılması içün, rezervuarlar – suv yedegini teminlemek içün qullanılacaq», – denile beyanatta.

Qırım Rusiye akimiyetiniñ başı Sergey Aksenov Qırımğa qoşma dizel-generatorlarnıñ ketirilmesini qısqartmağa avale etken edi.

Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti. Rusiye energetika naziri Aleksandr Novak aytqanı kibi, 100 MVt miqdarında elektrik energiyasınıñ aqımını dekabr 3 künü tarqatırlar, ekinci 100 MVt kelecek künü toplanır.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG