Link açıqlığı

Aqmescitte musafirhane, istiraat evlerine, restoran ve meyhanelerge aşhane ciyezlerini, savut ve mefruşatnı, şu cümleden türk imalatını satqan SHEN şirketiniñ tükânı işini toqtattı.

Qırım.Aqiqat mühbiri bildirgeni kibi, tükân Aqmescit merkezinde Puşkin soqağında yerleşe.

Hadimlerniñ sözlerine köre, tükân bu atfa qapatıldı. Bundan da ğayrı, aytqanları kibi, keçken afta şirkette büyük teşkerüvler başlandı. Hadimler işbu teşkerüvlerniñ devam etecek müddeti ve aqibetleri aqqında tahminlerini bildirmediler.

Şirketniñ hadimleri közetici strukturalarnıñ şirketke olğan böyle faal diqqatını Türkiye-Suriye sıñırında tüşürilgen Su-24 Rusiye uçağı ile bağlaylar. Bundan soñ Rusiye ve Türkiye arasında munasebetler birden bozuldı, bir qaç künden soñ Rusiye akimiyeti Türkiyege qarşı sanktsiyalarnı kirsetti.

Qırım akimiyeti de çette qalmayıp, Türkiye vatandaşları Qırımda çalışmaycağını bildirdi. «Türkiye areketlerini satqınlıq olaraq tanımaq mümkün… Şu sebepten Türkiye vatandaşları yarımadada çalışmaycaq, Türkiye mahsulatınıñ Qırım Cumhuriyetine ketirilmesi yasaqlanacaq», – dedi cumhuriyet başı Sergey Aksenov

SHEN şirketiniñ müdiri – belli qırımtatar iş adamı, evelleri Aqmescitte Türkiye Cumhuriyetiniñ itibarlı konsulı Seyran Osmanovdır.

Şirket hadimleriniñ sözlerine köre, onıñ aqiqiy saipleri Türkiye vatandaşlarıdır.

XS
SM
MD
LG