«Azatlıq» qırımtatar cemaat teşkilâtınıñ temsilcileri ve «Fond sovet mira» hayriye teşkilâtı uquq qoruyıcılar ile birlikte Qırım Muhtar Cumhuriyetiniñ qırımtatar milliy-territorial muhtariyet statusında tiklenmesini teşebbüs eteler. Bu kibi memorandum Kiyevde aşkâr etildi, dep bildire Qırım.Aqiqat mühbiri.
«Biz, Ukraina vatandaşları, cemaat teşkilâtlarnıñ temsilcileri ve uquq qoruyıcılar, Qırım yarımadasınıñ azat etilmesi ve qaytarılmasında küçümizniñ birleşüvi müim olğanını añlap, vatanımıznı işğalcilerden azat etmek ve Qırım Muhtar Cumhuriyetini milliy-territorial, yani yekâne, demokratik, mustaqil Ukraina erkânında qırımtatar muhtar cumhuriyeti olaraq tiklemek maqsadımız ile işbu memorandumnı imzaladıq», – denile memorandumda.
Vesiqa müellifleri aytqanı kibi, yarımadada milliy muhtariyetniñ olması onı tezce Ukraina nezaretine qaytarır.
«Devletniñ birinci şahıslarından Ukraina vatandaşlar içün oñaytlı yaşayış şaraitlerini yaratır, memlekette yaşayış seviyesini arttırır kibi bildirüvler Qırımnı qaytarmağa yardım eter degen fikir yañlış. Bunı halqara tecribesi tasdiqlay. Vatandaşlarnıñ iradesi esasında qoşuluv yoq edi. Şunıñ içün biz qırımtatar milliy-territorial cumhuriyetinin teşkil etilmesi vastası ile Qırımnıñ zulumsız sürette qaytaruv imkâniyetlerini qıdıramız», – dey qırımtatar faali Erfan Kudusov.
Faaller ukrain akimiyetinden yarımadada milliy muhtariyetniñ teşkil etilmesi aqta qararnı bekleyler. Yaqın vaqıtta Qırımda milliy muhtariyetniñ ümdelerini aks etken vesiqalarnı işlep çıqarmağa söz bergenler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
