Link açıqlığı

Rusiyeden Qırımğa qoyulğan energetik köpürniñ birinci yolağı quvetniñ tek aşğariy seviyesini teminley. Yarımadada elektrikniñ iqtisat rejimi saqlanıla.

Bu aqta Qırım.Aqiqat Radiosınıñ efirinde Ukraina energetika ve yaqarlıq naziriniñ sabıq muavini Vadim Ulida bildirdi.

«Tünevinki birinci nevbetniñ işlettirilmesi, ne vaqıt devamında çalışacağını bilmeyim, energetik bağlılığını al etmez. Çünki bizge 100-200 megavatt kele – Qırımğa kerek olğan quvetniñ 20%. Amma dispetçerniñ işini az buçuq yengilleştirir ve Qırım energetiklerine yarımadada energiyanı tarqatmağa imkân berir. Amma ciddiy iqtisat rejimi saqlanır», – dedi o.

Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti. Rusiye energetika naziri Aleksandr Novak aytqanı kibi, 100 MVt miqdarında elektrik energiyasınıñ aqımını dekabr 3 künü tarqatırlar, ekinci 100 MVt kelecek künü toplanır.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımda cuma künü Rusiyeden daa 300 generatornıñ kelmesini bekleyler. Bu afta andan endi o qadar generator ketirilgen edi.

XS
SM
MD
LG