Link açıqlığı

Ukraina Yuqarı Radasınıñ insan aqları boyunca vekâletlisi Valeriya Lutkovskaya Qırımda halqara teşkilâtlarnıñ imayesi altında insan aqlarınıñ qoruvı boyunca eyyetiniñ teşkil etilmesi zaruriy olğanını bildirdi, bunı o çarşenbe künü, dekabr 2-de, yedi ukrain matbuat vastasınıñ efirinde bildirdi.

«Qırımda insan aqlarını qorumaq içün yekâne imkân – anda daima çalışacaq bir qaç halqara eyyetni teşkil etmektir. Amma eki olmasın – Ukraina ve Rusiye Federatsiyasınıñ ombudsmenleri, böyle alda obyektivlik meselesi meydanğa kele. Halqara teşkilâtnıñ şemsiyesi astında bir merkez olmalı: OSCE, Avropa Şurası, BMT olsun. Amma halqara teşkilâtlar bugün Qırımğa kirmeli», – dey Lutkovskaya.

Qırım.Aqiqat, Tsentr jurnalistskih rassledovaniy, Hromadske.TV, ATR telekanalı, «Ukrainskaya pravda» neşiri, UA: Pervıy, Çernomorskaya TRK akimiyet ve cemaat arasında munasebetni tiklemek içün eki saatlıq efir içün birleştirler.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG