Adliyeciler Qırım deñiz qamaçavınıñ imkâniyetlerini ögrene, bu aqta yedi ukrain matbuat vastasınıñ efirinde salı künü, dekabr 2-de, Qırımtatar Milliy Meclisiniñ reisi Refat Çubarov bildirdi.
«Adliyecilerimiz halqara deñiz uquğını ögrene. Deñiz qamaçavını zaruriy şekilde yapmaq içün olğan halqara vesiqalarnıñ miqdarı yeterli olmağanına kelemiz. Baş assambleyanıñ mart 28 kününden beyannamesi devletlerni Qırım işğali şaraitlerinde Ukraina topraq mustaqilligini bozacaq areketlerni etmemek çağıra, amma embargo kibi qarar yoq. Adliyecilerimiz Ukraina ve ğarbiy şeriklerimizni Qırım territoriyasında embargo kirsetilmesi aqqında qararnıñ qabul etilmesine celp etmek içün yollarnı qıdıra, BMT seviyesinde – birinciden. Ekinci – arqadaşlarımıznıñ bir taqımı uquq qoruyıcı teşkilâtnıñ, şu sırada Grinpisniñ, o ya bu gemilerni toqtatmaq tecribesini ögrene», – dey Çubarov.
Qırım.Aqiqat, Tsentr jurnalistskih rassledovaniy, Hromadske.TV, ATR telekanalı, «Ukrainskaya pravda» neşiri, UA: Pervıy, Çernomorskaya TRK akimiyet ve cemaat arasında munasebetni tiklemek içün eki saatlıq efir içün birleştirler.
Qırım qamaçavı boyunca vatandaşlıq aktsiyasınıñ idarecisi Lenur İslâmov aytqanı kibi, Qırımğa mal, erzaq ve elektrikniñ ketirilmesi toqtatılğanından soñ, yarımadanıñ «deñiz qamaçavı» başlanır, şu cümleden Qırımnı Rusiye Federatsiyasınıñ Krasnodar diyarı ile bağlağan yekâne naqliyat arterriyası olğan Keriç keçitiniñ qamaçavı da.
