Link açıqlığı

Qırımnıñ rus prokurorı Natalya Poklonskaya Qırım qamaçavı boyunca vatandaşlıq aktsiyasınıñ idarecisi Lenur İslâmovnı ve diger iştirakçilerini yarımadağa kelmege «davet ete». Bunıñ ile o şunı da qayd etti ki, qamaçav faalleri siyasiy mabüslerniñ degil de, «cinayetçilerniñ» azat etilmesini talap ete.

«Lenur Edemoviç (İslâmov) ve Ko, Qırımğa hoş sefağa keliñiz! Ne içün kelmeysiz? Qorqaysıñız?», – yazdı Poklonskaya Facebookta.

«Özleriñizni büyük «terrorist» dep sayasıñız, yoqsa? Olarğa daa yetmediñiz. Ertemi-keçmi mahkeme ögünde turacağıñıznı, qırımlılarnıñ közlerine baqacağıñıznı añlamaysız, ğaliba», – dep qoştı o.

Qırım qamaçavı iştirakçileriniñ siyasiy mabüslerni azat etmek talabını – «manasız» olaraq adladı.

«Siziñ «siyasiy mabüsleriñizniñ» cedvelinde Ahtem Çiygoz kibi insanlar bar. Hatırlatam, Ahtem Çiygoz ağır cianetniñ etilmesinde qabaatlana. Rusiye Federatsiyasınıñ Cinaiy kodeksinde bu cinayet içün 8-15 yıllıq apis cezası qayd etilgen. Cinayet neticesinde bir qaç insan elâk oldı. İşbu insanlar «siyasiy mabüs» degil, cinayetçi ve qatillerdir», – yazdı o.

İslâmov ve Qırım qamaçavınıñ diger iştirakçileriniñ izaatı yoq.

Qırımda «fevral 26 işi» boyunca Meclis reisiniñ muavini Ahtem Çiygoz, dört çağına yetmegen balanıñ babası Ali Asanov ve Mustafa Degermenci yaqalanğanlar.

XS
SM
MD
LG