Türkiye baş naziri Ahmet Davutoğlu parlamentke Türkiye Nazirler kabineti programmasını taqdim etti, onıñ çerçivesinde işğal etilgen Qırım ve qırımtatarlar aqqında noqtalar qayd etilgen, haber ete QHA agentligi.
«Qırım tamır halqı olğan qırımtatarlarnıñ havfsızlığı ve eyi allığını temin etmek, qırımtatarlarnıñ aq ve menfaatınıñ teminlevi, bu maqsat içün kerek olğan teşebbüslerniñ olması içün bütün zaruriy tedbirlerni qullanacaqmız ve işlemege devam etecekmiz», – denile vesiqada.
Türkiye Nazirler kabineti programmasında Ukraina – Türkiye halqara munasebetleri aqqında noqtalar da qayd etilgen.
Noyabr 1 künü Türkiye parlamenti deputatlarınıñ saylavları keçti, neticede memleketniñ yañı 64-nci ükümeti teşkil etildi.
Bu sene Qırımnı yarımadada qırımtatarlarnıñ vaziyetini nezaret etecek uquq qoruyıcı ve alimlerniñ resmiy olmağan Türkiye eyyeti ziyaret etti. Eyyet Qırımda söz serbestligi, mahkeme sualleri, tasil ile bağlı insan aqlarınıñ bozuluvını qayd etti. Türkiye eyyetiniñ maruzası Rusiye Federatsiyasınıñ prezidenti Vladimir Putinge berildi.
